Galxamur,(cakaaranews),Isniin, 20ka February, 2017. Masuuliyiin ka socday xafiiska caafimaadka DDSI ayaa dawooyin iyo qalab caafimaad oo kala duwan gaadhsiiyay xarunta caafimaadka ee degmada galxamur ee gobolka Doolo. Waxayna ku wareejiyeen dawooyinka iyo qalabkan caafimaadka masuuliyiinka xarunta caafimaadka galxamur iyada oo ay goob joog ahaayeen masuuliyiinta maamulka degmada galxamur.
Maareeyaha mashruuca dhimista dhimashada hooyada iyo dhalaanka ee xafiiska caafimaadka DDSI mudane Shaafici Daahir Muuse oo ka mid ahaa masuuliyiinta wareejisay daawooyinka iyo qalabka caafimaadka ayaa uga warbixiyay shabakada wararka ee cakaaranews faa’iidooyinka ay bulshada u leeyihiin dawooyinka iyo qalabka caafimaadka ee la gaadhsiiyay xarunta caafimaadka ee degmada galxamur isaga oo sheegay in xafiiska caafimaadka DDSI dadaal xoogan ugu jiro sidii bulshada DDSI meelkasta oo ay joogto loo gaadhsiin lahaa adeeg caafimaad oo taya leh. Wuxuuna intaasi ku daray in aanay ahayn oo kaliya in hadda xarunta degmada galxamur la soo gaadhsiiyay dawooyinka iyo qalabka caafimaadka. waxaan ku soo wareejinay ayuu yidhi masuulku dawooyinkan iyo qalabkan kala duwan xarunta caafimaadka ee degmada Danood, Cusbitaalka Wardheer iyo waliba xarumo caafimaad oo ka tirsan degmooyinka gobolka jarar.