Fiiq, (cakaaranews) Isniin, 30ka May, 2016  Wafti  uu Hogaaminayo Wasiir Ku xigeenka Qurbajoogta DDSI Ahna Ku simaha Xafiiska Qurbajoogta DDSI Mudane Cabdi Khaliif Buraale (dhoombe) oo ay  ku Wehlinayo  Mareeye Ku xigeenka ururka  Hormarinta Somalida itoobiya Ahna Ku simaha UHSI  Mudane Cabdikhadar Ilyaas Gaaruf  ayaa gaadhsiiyay dugsiga hoyga agoonta ee magaalada fiiq koonteenar deeq ah.

Deeqdaasi  oo ka timiday Jaaliyadda DDSI ee wadanka Australia ayaa waxa  ahayd  Konteenar Agab kala duwan sida aaladaha cumputerka, Sariiro, Furaashyo, Dhar, Buugaag, Qalimaan, Agabka-caruurtu ku ciyaarto, iyo agab kale oo kala duwan. xaflada lagula kala wareegayo deeqan oo ay ka soo qaybgaleen masuuliyiinta gobolka Erar, kuwa degmada fiiq iyo masuuliyiinta dugsiga hoyga aqoonta ayaa ka dhacday dugsiga hoyga aqoonta ee fiiq.

Waxaa Xaflada ugu Horeyn ka Hadlay Gudoomiyaha Gobolka Erer Mudane Axmed Xaaji Adan oo uga Mahad Celiyay dhamaan masuuliyiinta, qurbajoogta iyo Jaaliyadda DDSI Ee Australia oo Deeqdan Soo gaarsiisay. Wuxuuna  Sheegay in ay tahay Arrin aad u Farxad galineyso Caruurta Agoonta Ah ee Wax Barta Dugsiga Hoyga Agoonta Ee magaalada Fiiq oo ah arday ay waalid koodii dileen hadhaagii UBBO.

Waxaa kaloo halkaasi ka Hadlay  Maareeyaha Dugsiga Hoyga Agoonta Magaalada Fiiq Marwo Ubax Mursal oo uga Mahadcelisay jaaliyadda DDSI Ee Australia ay Yihiin jaaliyad Kaalinteedi kaga Aadan Taageerada dugsiga Hoyga Agoonta ee Magaalada Fiiq ay ka soo baxeen Kaalintoodii.

Ugu danbayntii Waxaa Halkaasi Ka Hadlay Wasiir Kuxigeenka Qurbajoogta DDSI Mudane Cabdi Khaliif Buraale  ( Dhoombe) oo Sheegay in Markii Hore Qurbajoogta Ay Aaminsanaayeen Fikirado Khaldan Markey Xukuumadda DDSI uu Hogaaminayo Madaxweynaha DDSI Mudane Cabdi Maxamuud Cumar u Sheegay Xaqiiqada Ka Jirta Deegaanka ay Garowsadeen  taasina ay tahay tan  Maanta Qurbajoogta DDSI u Taagan sidii Shacabka Deegaanka ay Deeq iyo Taageero ay u Garab Taagan Yihiin.

Jigjiga (cakaaranews) Isniin, 30ka May, 2016, Madaxwayne ku xigeenka ahna wasiirka waxbarashada DDSI mudane Mawliid Haayir Xasan oo si toos ah ugu waramay warbaahinta deegaanka ayaa sheegay in guud ahaanba imtixaankii heer qaran ee fasalka  12aad dib loo dhigay.

Wuxuuna sheegay madaxwayne ku xigeenku in go’aan ka soo baxay wasaarada waxbarashada JDFI uu ahaa in imtixaanka fasalada 12aad  oo maanta ka bilaabmayay guud ahaanba dalka dib loo dhigo  ujeedada dib loogu dhigayna  tahay sidii loo adkayn lahaa tayada waxbarashada  taasi oo   xoojinaysa  tayada cudud waxbaratay oo kaqayb qaadata isbadalka kobaca dhaqaalaha dalka. waxaa kale oo uu sheegay  madaxwayne ku xigeenku  in muddo kooban gudaheed la bilaabidoono imtixaankan.

Jigjiga (Cakaaranews) Talaado 31 may 2016. Madaxwaynaha DDSI mudane Cabdi Maxamuud Cumar ayaa maanta soo xidhay kulanwaynihii 7aad ee wadatashiga xukuumada iyo shacabka DDSI oo socday mudo 5 maalmood ah.

kulanwaynahan oo ay kasoo qaybgaleen in kabadan 2kun oo shaqsi ayaa xidhitaankii kahor lagu soo bandhigay tartan faneed heesaha halalaasiga ah ee kaladuwan oo si live ah ay ugu tartamayeen kooxaha kaladuwan ee fanka deegaanku iyadoo xubnihii kaalinta 1aad, 2,aad iyo 3,aad galay lashilimaaday islamarkaana lasoo jeediyay magacyada xubnihii halgan faneedka kaga qaybqaatay xiligii xaalada deegaanku ugu xumayd ee lasoo dhaafay oo iyana la abaal-marin doono.

Hadaba Madaxwaynaha DDSI mudane Cabdi Maxamuud Cumar ayaa xidhitaankii kulanwaynahan usoo bandhigay qodobo muhiim ah oo ay tahay in si fiican loo hirgaliyo. Waxaana kamid ah: in dhulka seeraha ah lajoojiyo gabi ahaanba oo cid dhul-daaqsimeed seero ah samaysan karta aysan jirin, in cidda dhulbeereed leh ay beerato hadii ay beeran waydana canshuur dheeraad ah lasaari-doono kadib hadii ay beeran waydana lagawareejin doono oo cidbeerata lasiin doono, in dumaasha, dhaxalka iyo magtaba lawaafajiyo sida shareecada diinteena islaamku dhigayso.

Ugudanbayna odayaashii, culimo-awdiinkii, Hooyooyinkii iyo marti sharaftii kale ee kasoo qaybgashay kulanwaynahan ayaa cod buuxa oo ay gacanta uwada taageen ku ansixiyay qodobada muhiimka ah ee uu madaxwaynuhu soo bandhigay. Kadibna madaxwaynaha DDSI mudane Cabdi Maxamuud Cumar ayaa duco balaadhan oo meel kasta taabanaysa kusoo xidhay kulanwaynihii.

Jijiga ( cakaaranews ) Talaado, 31 may 2016. Telefishinka caalamiga ah ee Aljazeera ayaa UBBO dhulka ladhacay kadib markuu soo bandhigay xaqiiqada dhabta ah ee deegaanka kajirta ee uu Cabdiraxmaan maadey beenta kasheegay.

Sida lawa ogsoon yahay, Hogaamintii hore ee UBBO iyo qab-qablayaashii soomaaliya gaar ahaan C/raxmaan Maadey oo ah nin aan dhanayn dhakhaatiirta caalamkuna uqortey inuu markasta dhageysto muusiqa nooca shucaaca leh ee lagu daweeyo qayb kamid ah waalida ayaa wuxuu wareysi been abuur ah oo deegaanka khuseeya bilihii lasoo dhaafay siiyay Aljazeera isagoo xaalada dhabta ah ee deegaanka ogaa. wuxuuna baryahanba wadnaha farta kuhayay xiliga lagaga daba-iman doono ee lafashilin doono beentiisii ahayd "Dibi baa sac dhalay".

Hadaba wariyeyaasha TVga caalamiga ah ee Aljazeera oo baryahanba kusugnaa deegaanka soomaalida itoobiya si ay uxaqiijiyaan xaalada dhabta ah ee kajirta deegaanka ayaa been abuur cad kutilmaamay waraysigii Maadey iyagoo sheegay inay aad ugaxumaadeen beenta intaa le'eg ee xataa sumcada TVga wax u dhimaysa. waxayna UBBO ugarwaaqsadeen inay yihiin urur argagixiso ah kadib markay arkeen ardeyda Agoonta ah ee kuxaraysan dugsiyada Hoyga ee waalidkood UBBOdu laysay islamarkaana ay xukuumada deegaanku gacanta kuhayso.

Si kastaba ha ahaatee, iyadoon wax jawaab ah laga bixinin wareysigiisii hore ee beenta ahaa ee uu siiyay Aljazeera ayay ugu horaynba dhamaan dadka afka soomaaliga kuhadla iyo caalamkuba layaabeen been abuurka cad ee uu kasheegay horumarka iyo nabadgelyada deegaanka soomaalida kajira ee isaga dib ugu noqotay.

Aduunow futa-xume, C/raxmaan Maadey ayaa markuu fashilaada wareysigiisii maqlay waali kudhuftay oo dibna dhagaha ugashaday muusiqiisii shucaaca lahaa ee lagu yaqaanay. waxaase wax aad loogu farxo ah sida ay Aljazeera isula doonatay beentiisii iyo xaqiiqada, iyo waliba jawaabta ay wiilashii shalay fikirka laga khalday bixiyeen. Taas oo aan wax loo dhigo jirin.
Horaa loo yidhi "dawaco meesha ay macal uga baratay ayay macaluul ugu dhimataa". Taas oo kadhigan in Maadey uu wali ka samri la'yahay dhiigii iyo dhicii umada oo uu qaadan la'yahay wiilasha yaryar ee ka afqabtay. Arintan ayaana ah mid ay shacabka deegaanka iyo qurbajoogtuba aad ulayaabeen. 

Jigjiga (cakaaranews) talaado, 31, May , 2016 Tababar  ay fulintiisa iska kaashadeen  xafiska adeega shacabka iyo horumarinta cudada shaqaalaha DDSI  iyo shirkada isgaadhsiinta itoobiya ayaa ka qabsoomay xarunta deegaanka ee jigjiga.

Tababarkan oo looqabtay 22 iskaashato oo ka kala socday  gobolada  Afdheer, Shabeele,Faafan, Qoraxay iyo Jarar  ayaa waxay dulucda ujeedadiisu ahayd in xubnahan ka socday iskaashadooyinkaasi fahan buuxa laga siiyo nidaamka adeegsiga aaladaha casriga ah ICT.

Waxaana furitaankii tababarkan ka hadlay maareeyaha shirkada isgaadhsiinta ee laanta deegaanka harar mudane Adnew Gabre kaasi oo ka warbixiyay ahmiyada tababarkan wuxuuna sheegay in mudada uu socto tababarkani lagu qaadan doono casharo kor loogu qaadayo aqoonta xubnahan iskaashatooyinka gaar ahaan barashada aaladaha casriga ah ee ICT.

Waxaa kale ka hadlay furitaankii tababarka agaasinka waaxda  ICT  ee  xafiiska adeega shacabka iyo horumarinta cududa shaqalah  DDSI  Mundane Cabdikhadar Caaqil Colaad oo sheegay muhiimada uu leeyahay tababarkani wuxuuna ku booriyay xubnahan qaadanaya tababarka in ay mudda uu socdo ka faa’iidaystaan is ay uga faa’iideeyaan iskaashatooyinka ay ka socdaan. Sidoo kale waxa uu sheegay in uu socon doona tababarkani mudo 5 maal-mood ah.

Jigjiga(cakaaranews) Arbaca,  1da  June 2016 Wasiirka xafiiska caafimaadka DDSI mudane Cabdifataax Siciid ayaa maanta tababar mudo 3 maalmood ah socday u soo xidhay  khabiiro, gadhwadeenada geedi socodka xafiiska caafimaadka DDSI iyo xubna ka socday hay’adaha ay bahwadaagta yihiin xafiiska caafimaadka DDSI.

Tababarkaasi  oo ahaa tababarka tababarayaasha  ayaa waxay ujedadiisu ahayd in fahan buuxa laga siiyo xubnahan nidaamka diyaarinta qorshaha sanadlaha ah ee xafiisyada caafimaadka degmooyinka iyo maamuada magaalooyinka si looga midho dhaliyo qorsha la diyaariyay.

Wasiirka xafiiska caafimaadka DDSI mudane cabdifataax siciid  oo ka hadlay soo xidhitaankii tababarkaasi ayaa sheegay in xooga lagu saarayo istaarajiyadaha lagaga  midho dhalinayo dajinta qorshe ku salaysan natiijo. Wasiirka ayaa si qoto dheer uga warbixiyay qorshayaal kor loogu qaadayo tayada adeegyada caafimaadka oo uu fulinayo xafiiska caafimaadku  tababarkana uu yahay mid ka duwan tababaradii hore maadaamo oo uu yahay mid degmooyinka ka caawinaya sida looga guul gaadho qorshaha la dajiyay ee ku salaysan dhinaca adeegyada caafimaadka. Wasiirka ayaa ku booriyay xubnahan qaatay tababarka tababarayaasha  in ay sidii loogu talagalay uga midho dhaliyaan.

Qaarka mid ah xubnihii qaaday tababarkaasi ayaa sheegay in ay mudadii uu socday tababarku ka faa’iidaysteen aqoon ay kaga midho dhalinayaan dajinta qorshe leh natiijo iyo guul.  

Jigjiga(cakaaranews)khamiis 2da june 2016. Imtixaanka fasalka 8aad ee heer-deegaan ayaa maanta loosii qaaday dhamaan deegaanka oo dhan kaasoo ka dhici doona 447 goobood islamarkaana bilaabmi doona1 sane hadii alle idmo.

Hadaba G/GS/ Horumarinta Manhajka iyo Imtixaanaadka ee Xafiiska waxbarashada DDSI mudane cabdulaahi idiris cilmi oo ka waramay imtixaankan heer deegaan ee faslaka 8aad ayaa sheegay in maanta dhamaan deegaanka loosii wada qaaday imtixaankii heer deegaan ee fasalka 8aad iyadoo imtaxaankuna uu si rasmi ah uga dhici doono 447 goobood.

Ugu danbayna agaasinka ayaa la dardaarmay hawl-wadeenada imtixaanka qaadaya inay ilaaliyaan nidaamka anshaxa imtixaanka islamarkaana ay aad uga taxadaraan qishka iwm. sidookale wuxuu agaasinku ka hadlay in ardayda qaadanaysa imtixaanka fasalka 8aad ay iyana ilaaliyaan anshaxa imtixaanka si fiicana uga shaqeeyaan maadama oo si fiican wax loosoo baray.

Dhagaxbuur (Cakaaranews )khamiis 2da June 2016. Madaxa xafiiska waxbarashada Maamulka magaalada dhagaxbuur oo u waramay shabakada wararka ee cakaaranews ayaa sheegay in meel fiican ay marayso heerka waxabarashada maamulka magaalada dhagaxbuur islamarkaana loo diyaargaroobay imtaxaankii fasalka 8aad ee heer deegaan.

Hadaba Madaxa Xafiiska Waxbarashada Maamulka Magaalada Dhagaxbuur mudane Faysal Cabdiqaadir Sulub  ayaa sheegay in Tirda dugsiyada mm dhagaxbuur marayaan 11dugsi oo 10 kamid ahi ay dawli yihiin meesha midka soo hadhay uu yahay dugsi gaarlooleeyahay. waxayna kala yihiin 4 Dugsiyada hoose, 4 dugsiyada hoose/dhax iyo 2 dugsiyada sare ah. Wuxuuna intaa kudaray in Tirada guud ee ardayda m.m dhagax buur ay yihiin 8583 Arday oo 5262 ay yihiin lab meesha 3321 ardayna ay tahay dhadig. Iyadoo Macaliminta dugsiyaduna ay tiradoodu kabadntahay 251 macalin oo heerka aqoontooduna kala tahay 5  macalin waa Mastert, 30 macalina waa degree, 68macalina waa Diplome, iyo waliba 147 macalin oo  T.T.I. ah.

Sidookale madax xafiiseedka ayaa xusay in kor loo qaaday nidaamka baris barasho iyadoo la raacayo qorshayaashii iyo yoolasha siyaadeed ee xafiiska waxbarashada iyo XDSHS ee ah Kor u qaadida tayada waxbarashada, kaqaybgalka dadwaynaha, sii adkaynta nidaamka xisbinimo iyo mamulka suuban ee dhanka xafiiska, baraayaasha aradaydaba, dhiirigalinta gabdhaha, iyo waliba dhisida akhlaaqda iyo ladagaalanka fikirada xunxun ee argagixisanimo.

Wuxuuna intaa kudaray in ka xafiis ahaan ay ka midho dhaliyeen islamarkaana ay kor  u qaadeen dhanka kaqaybgalka dadwaynaha iyo ladagaalanka fikirada xunxun ee aragagixisanimada maadaama oo kaqaybgalka bulshadu ay tahay muhiimada ugu horaysa ee waxbarashada.

Ugudanbayna  wuxuu xusay in kulan joogta ah ay layeeshaan dhaaman waalidiinta ardayda waxkabarata dugsiyada maamulka magaala dhagaxbuur, islamarkaana ay sameeyeen iskuxidhka ardayda ee 1-5 iyo sidookale barayaasha kahawlgala M.M Dhagaxbuur iyadoo gudiyada waxbarashaduna ay si toosa u shaqeeyaan.

Jigjiga (cakaaranews) khamiis, 2da, June, 2016 Ururka horumarinta soomalida itoobiya ayaa xaflad  casho sharaf ah oo si  aad u qurux badan loo soo diyaariyay u qabtay jaaliyada DDSI ee wadanka  Australia ee xubnaha ka ah UHSI. Xafladaasi oo ka dhacay huteelka Nogob ee magaalada jigjiga ayaa waxaa ka soo qaybgalay maareeye ku xigeenka ururka horumarinta somalid itoobiya ahna ku simaha UHSI mudane Cabdikhadar Ilyaas Gaaruf, masuuliyiin heer deegaan ah, jaaliyada loo sameeyay xaflada iyo xubno ka mid ah qurba joogta DDSI ee ku sugan caasimada DDS.

Waxaana xafladaasi casho sharafta ah ugu horyntii ka hadlay ku simaha maareeyaha UHSI ahna maareeye ku xigeenka UHSI mudane Cabdikhadar Llyaas Gaaruf oo ugu hoyntii ka warbixiyay taariikhda iyo waxqabadka ururka horumarinta soomalida. Wuxuuna sheegay in tan iyo intii la hirgaliyay UHSI uu wax wayn ka qabtay guulna  ka soo hooyay dhinacyada adeegyada aas aasiga ah ee bulshada sida waxbarashada, caafimaadka, helitaanka biyaha nadiifta ah iyo  wacyigalinta bulshada.

Waxaa kale oo uu ku simaha maareeyuhu ka warbixiyay ujeedada iyo ahmiyada xaflada casho sharafta ah taasi oo uu sheegay in ay dulucdeedu tahay  mid lagu casuumay   xubnaha jaaliyda DDSI ee wadanka  Australia  ee xubnaha ka ah UHSI waxaana loogu mahad celinayaa ayuu yidhi masuulku  kaalinta ay ka gaysteen ka qayb-qaadashada hawlaha horumarka deegaanka gaar ahaan koonteenarkii agabka kala duwan ahaa ee ay dhawaan gaadhsiiyeen jaaliyadani dugsiga hoyga agoonta ee magaalada fiiq.

Dhankooda xubnihii qurba joogta ahaa ee loo sameeyay xaflada casha sharafta ah ayaa siwayn ugu mahad naqay masuuliyiinta UHSI. waxayna ka  warbixiyeen dadaalka ay xukuumada DDSI  ee dhinaca kor u qaadida xidhiidhka qurba joogta DDSI  iyo guulaha ay ka soo hoysay dhinaca hirgalinta qorshaasha horumarineed waxayna sheegeen in ay sii xoojinayaan ka qaybgalka hawlaha horumarka deegaanka.

Gabagabadii xafladaa  casho sharafta ah ayaa masuuliyiinta ururka horumarinta soomalida itoobiya waxay shahaadooyin sharaf gudoonsiiyeen jaaliyada DDSI ee Australia ee xubnaha ka ah UHSI.  

Jigjiga( Cakaaranews ) Talaado, 26ka April 2016. Madaxwaynaha DDSI mudane  Cabdi Maxamuud Cumar ayaa saaka soo afmeeray shirkii qiimaynta mashaariicaha biyo-xidheenada waa wayn ee kala ah: baka, goomaar, wiji-waaji iyo maraacaato isagoo kubooriyay in mudo 10 cisho ah lagu dhamaystiro waxa dhiman.

Hadaba shirkadaha iyo engineerada gacanta kuhaya mashaariicahan ayaa dhankooda balanqaaday inay kaga soo bixi doonaan mudada loo cayimay dhamaystirka waajibaadka shaqooyinka uyaala.

Dhanka kalana, madaxwaynaha DDSI mudane Cabdi Maxamuud Cumar oo uu weheliyo wasiirka ganacsiga iyo gaadiidka DDSI mudane Khadar Cabdi Ismaaciil ayaa gobolada iyo degmooyinka deegaanka kalahadlay arimaha kontarabanka sharci darada ah ee deegaanka soo gala. In kasta oo kontarabanka sharci darada ah aad loo yareeyay 5tii sano ee u danbaysay marka loo eego sanadihii hore. Wuxuuna madaxwaynuhu xusay in mas’uuliyiinta gobolada iyo degmooyinka deegaanku ay wada-shaqayn layeeshaan hay’adaha kuhawlan kahortaga kontarabanka sharci darada ah ee waxyeelaynaya nolosha iyo ganacsiga xorta ah ee kajira guud ahaan dalka.

Sidoo kale, wasiirka ganacsiga iyo gaadiidka mudane Khadar Cabdi Ismaaciil ayaa kawarbixiyay isbadalka waxkaqabad ee uu xafiisku kakeenay dhinaca ladagaalanka kontarabanka sharci darada ah isagoo wada shaqayn toos ahna laleh jibriyada. Wuxuuna wasiirku kula dar-daarmay gobolada iyo degmooyinka inay kasoo dhalaalaan shaqooyinka kaga aadan ladagaalanka kontarabanka.

 Ugudanbayna, gobolada iyo degmooyinka deegaanka ayaa balanqaad balaadhan kasameeyay arintaasi.

Adama(Cakaaranews) Talaado 26ka April 2016. Tababar uu soo agaasimay Wasaarada Adeega Shacabka iyo Horumarinta Cududa Shaqaalaha JDFI islamarkaana ujeedadiisu ahayd  Ka doodida Mashruuca qiimaynta iyo darajaynta Shaqada Ee Job and Evaluation Grade (JEG) iyo waliba daradar galinta shaqooyinka maamulka suuban oo ay kasoo qaybgaleen masuuliyiinta xidhiidhka dadwaynaha iyo masuuliyiinta warbaahinta ee Fadaraalka, deegaanada Dalka iyo labada ismaamul magaalo ayaa maanta lagu soo gabagabeeyay  Ayu International Hotel ee magaalada Adama ee Deegaanka Oromiya.

HadabaTababarkan oo socday mudo sadex cisho ah ayaa waxaa xidhitaankiisii ka hadlay Wasiiru-dawlaha Wasaarada Adeega Shacabka iyo Horumarinta Cududa Shaqaalaha mudane Tamasgan Tilahun  oo sheegay in tababarkan lagu soo bandhigayay faa’iidooyinka uu leeyahay  mashruuca qiimaynta iyo darajaynta shaqada ee looyaqaano (JEG) iyo waliba in shaqooyinkiisii ay soo dhamaadeen islamarkaana larabo in laga hirgaliyo dhamaan dalka sanadka soo socoda ee 2009 T.I. isagoo mashruucani muhiimadiisu ay tahay midaynta dhamaan mushaarka shaqaalaha dawliga ah ee shaqooyinka isku midka ah qabta. Wuxuuna suurta galinayaa in darajooyinka iyo shaqooyinka isku midka ahi ay mushaar iskumid ah noqdaan.

Sikastaba ha ahaatee mashruucan oo shaqooyinkiisa iyo daraasaadkiisu ay soo socotay mudo 4 sono ah ayaa si balaadhan ay uga doodeen masuuliyiintii tababarka qaadanaysay islamarkaana lagu soo gunaanaday si aad u heer saraysa iyadoo masuuliyiintu ay kalaqateen jahooyinkii iyo sidii uu deegaan kasta uga hirgali lahaa sanadka sooscoda ee 2009 T.i.

Jigjiga( Cakaaranews ) Talaado, 26ka April 2016. Madaxwaynaha DDSI mudane Cabdi Maxamuud Cumar ayaa maanta xadhiga kajaray mashruucii biyo xidheenka qabalaha waaji ee Degmada koonfurta jigjiga  ee dhawaan ladhagax dhigay.

Hadaba madaxwaynaha ayaa waxaa booqashadan xadhig kajarka ah ku wehelinayay marti sharafka khaaska ah ee Madaxwaynaha dawlada deegaanka Canfarta Mudane Xaaji Siyon oo khibrad kaqaadasho uyimid deegaanka, Afhayeenka Golaha Xildhibaanda DDSI ahna Gudoomiyaha XDSHSI mudane Maxamedrashiid Isaaq madaxwayne kuxigeenada DDSI, Golaha kabineega, Maamulada Gobolada iyo degmooyinka iyo waliba marti sharaf kale.

Madaxwayne Cabdi Maxamuud Cumar oo kahadlay xafladan xadhig kajarka ah ayaa sheegay in baahida koobaad ilaa ta shanaad ee deegaanku ay tahay biyo islamarkaana ay xukuumada DDSI xooga saartay sidii ay shacabwaynaha deegaanka uga haqab-tiri lahayd baahida biyaha iyadoo man-power, Machinery iyo Budget kufilan usamasay si ay uga midho dhaliso yoolasheeda ku aadan baahida biyaha. Waxayna xukuumadu samaysay wakaalada Dabagalka Daraasaadka iyo Naqshadaynta. Taasoo guulo waa wayn kasoo hoyisay dhanka daraasaadka, Naqshadaynta iyo dabagalka ee khaastan biyaha si biyo looga helo dhulka hoostiisa gaar ahaan ceelasha dhaadheer. Sidaasdarteed ayay biyo xidheenadu waxay qayb ka yihiin qorshaha ay xukuumadu qaadatay si biyo la’aanta looga baxo. Wuxuuna intaa kudaray in biyaha galay biyo xidheenkan waaji ay u dhigmaan in kabadan 800 oo Barkadood biyahood oo looga faaiidaysan doono dhanka waraabka beeraha, bulshada iyo xoolahaba. Madaxwaynaha ayaana hadalkisii kusoo xidhay hambalyo iyo bogaadin ku aadan Maamulada Gobalada, Degmooyinka iyo dhamaan shacabwaynaha deegaanka isagoo carabka ku dhuftay in qorshahani yahay midkii lagaga qalin-jabin lahaa saboolnimida ee uu dalku kaga mid noqon lahaa wadamada uu dhaqaalahoodu dhex-dhexaadka yahay.

Sidookale waxaa xafladan kahadlay Madaxwaynaha Dawlada Deegaanka Canfarta, Madaxwayne Kuxigeenka DDSI ahna wasiirka Xafiiska Beeraha iyo Horumarinta Khayraadka Dabiiciga ah Marwo Sucaad Axmed Faarax iyo waliba kusimaha Gudoomiyaha Gobalka faafan ahna Gudoomiye kuxigeenka Gobolka oo dhamaantood bogaadiyay 174ka biyo-xidheen ee deegaanka laga dhisay ee uu kamidka yahay biyo-xidheenkan qabalaha waaji.

Ugudanbayna munaasabadan xadhig kajarka ah ayaa waxaa lagu soo afmeeray qado sharafeed si heer sare ah loo soo qaban qaabiyay.

Jigjiga(cakaaranews) Talaado, 26ka April 2016. Xaflad balaadhan oo si meeqaam sare ah loo soo agaasimay ayaa caawa ka dhacday  barxada wayn ee xarunta madaxtooyada cusub taasi oo ay ka soo qaybgaleen masuuliyiinta xukuumada DDSI ugu saraysa oo uu ka mid yahay  madaxwaynaha DDSI mudane Cabdi Maxamuud Cumar, madaxwayne ku xigeenada DDSI, afhayeenka golaha baarlamaanka DDSI ahna gudoomiyaha XDSHSI mudane Maxamedrashiid Isaaq, golaha wasiirada DDSI,gudoomiyayaasha gobolada, gudoomiyeyaasha degmooyinka, shaqaalaha dawlada, kooxaha fanka iyo suugaanka DDSI  iyo marti sharaf kale oo uu ka mid yahay madaxwaynaha deegaanka canfarta mudane Xaaji Siyon.

Xafladan  casho sharafta ah ayaa waxay ahayd mid lagu abaalmarinayay hogaamintii degmooyinka ee hormuudka noqotay islamarkaana  sida dhabta ah uga midho dhalisay fulinta qorshihii ay dajisay xukuumadu ee dhinaca biyo xidheenada  degmooyinka deegaanka. Xafladan ayaa waxay ka danbaysay ka dib markii la soo gabagabeeyay shirkii qiimaynta degmooyinka deegaanka ee diirada lagu saarayay dhinaca biyo xidheenada taasi oo lagu soo kala baxay darajada 1aad iyo 2aad.

Madaxwaynaha DDSI mudane Cabdi Maxamuud Cumar ayaa ka soo jeediyay xafladan khudbad ay ahmiyadeedu tahay qorshayaasha ay dajisay xukuumada ee ku salaysan ka jawaabida baahiyaha bulshada iyo fulinta qorshayaashaa. Wuxuuna sheegay madaxwaynuhu in ay xafladani tahay mid lagu abaalmarinayo gudoomiyayaashii sidii loogu talagalay u fuliyay qorshihii la kala qaatay ee dhinaca biyo xidheenada degmooyinka deegaanka. Waxaa kale oo uu sheegay madaxwaynuhu in ay xukuumada DDSI dadaal culus   ugu jirto sidii shacabka looga faa’iidayn lahaa  qabashada biyaha wabiyada, kaydinta biyaha cirka iyo soo saarida biyaha dhulka hoostooda si loo gaadho horumar waara.

Haddaba  waxaa caawa lagu abaalmariyay xafladan oo noqday hormuudka degmooyinka deegaanka ee biyo xidheenada ugu wanaagsan sameeyay darajada 1aad waxaa kaalinta 1aad biyo xidheenka degmada goday kaalinta 2aad biyo xidheenka degmada Awbare kaalinta 3aad biyo xidheenka degmada Dhagaxbuur. Waxaana gudoomiyayaasha sadexdaasi degmo caawa la gudoonsiiyay abaalmarino ah mid kiiba   hal baabuur oo cusub iyo shilimaad ay ka mid yihiin  laabtoobyo, moobilo, booto/jago dhul ah iyo waliba  jeeg lacageed.

Dhanka kale degmooyinka darajada 2aad loo qaatay waxaa ka mid ahaa degmada shilaabo, jigjiga iyo  hudhat waxaana gudoomiyayaasha sadexdaasi degmo la gudoonsiiyya shilimaad ay ka mid yihiin laabtoobyo, moobilo iyo bilado.

Jigjiga( Cakaaranews ) Arbaco, 27ka April 2016. Madaxwaynaha DDSI mudane Cabdi Maxamuud Cumar ayaa saaka hoolka shirarka ee xafiiskiisa kafuray shirkii golaha amaanka ee xiliilaha ahaa.

Shirkan ayaa waxaa kasoo qaybgalay mas’uuliyiinta hay’adaha amaanka oo ay kamid yihiin janaralka ciidanka difaaca qaranka qaybta koonfur bari mudane janaraal Abraham woldemariam, janaraalka guud ee ciidanka gaarka ah ee Liyuu booliska mudane Cabdiraxmaan Cabdulaahi Buraale, hogaamada nabadgelyada iyo taliska kifladoorada deegaanka iyo waliba komishineerada komishinka booliska DDSI.

Hadaba madaxwaynaha DDSI mudane Cabdi Maxamuud Cumar oo ugu horayn furay shirkan ayaa kahadlay ajandaha shirka oo ahaa sii adkaynta iyo xoojinta xaalada nabadgelyada xuduudaha dalka iyo ladagaalanka ururada argagixisada ah sida al-qushaash isagoo sheegay in al-qushaash marka laga eego xaga diinta ay gabbaadka kadhiganayaan ee islaamka aysan waxba ka aqoonin oo kooda ugu sareeya uu dhinaca quraanka kagaadhay innaa ac-dhayn oo ay yihiin dad maskaxda laga guumaysto oo faataxada kali ah warqad loogu qoray iyagoo dhinaca dagaalkana ah fullayo markaba dhabarka jeediya oo aan udulqaadan karin xabbada ciidamada qaranka iyo kuwa deegaanka labadaba. Wuxuuna madaxwaynuhu intaa raaciyay in gawraca alqushaash ay kusamayso shacabka soomaaliya ay katahay hala idinka cabsado oo kali ah ee aysan ka ahayn geesinimo waayo waxay iska celin lahaayeen ciidamada dagaalada fool kafoolka ah lagala ee ay markaba dhabarka uduwayaan. Wuxuuna madaxwaynuhu hadalkiisa kusoo xidhay in alqushaash iyo dadyawga garabka la ah ee kuriyoonaya dhul aysan lahayn ay yihiin cadaw si cad ugu soo gardarooday deegaanka soomaalida. Cidii kusoo gardaroota deegaankana markaaba looga jawaabi doono gardarada sharci darada ah sidii hada kahorba dhacday.

Shirkan ayaana lagu gorfeeyay xaalada nabadgelyada xuduudaha dalka guud ahaan iyagoo halkaana lagu soo bandhigay tabaha taagta daran ee al-qushaash iyo qaabdhismeedkooda oo baryahan danbe qabiilo kuxidhmay. Waxaana lagu soo gabagabeeyay in ladagaalanka argagixisada al-qushaash ee damaaciday meelo kamid ah deegaanka lasii xoojiyo si aysan mar danbe u hawaysaninba.

Ugudanbayna, madaxwaynaha ayaa mahadcelin balaadhan udiray ciidamada qaranka iyo ciidanka gaarka ah ee kusugan xuduudaha dalka guulihii ay kasoo hoyiyeen ladagaalanka argagixisada. Wuxuuna kubooriyay inay halkaa kasii wadaan wadaniyada difaaca iyo naf uhurida dalkooda.

Jigjiga (Cakaaranews) Arbaco 27ka April 2016. Kooxaha Manchester City iyo Real Madrid ayaa barbaro gool la’aan ah ku kala baxay kulankii lugta hore ee Etihad Stadium ka dhacay waxayna labada kooxood ku kala bixi doonaan kulanka lugta danbe ee Santiago Bernabue. Inkasta oo ay Real Madrid qaybtii danbe ee kulakan ay heshay fursado goolal cadaan ah loo fishay oo ay kala heleen Casemiro iyo pepe haddana goolhaye Joe Hart ayaa Sky Blues ka bad baadiyay in garoonkooda wax gool ah looga dhaliyo halka Navas uu dhamaadkii kualnkan badbaadiyay fursadii ugu halista badnayd ee City.

Manchester City ayaa Etihad Stadium ku soo dhawaysay Real Madrid kulanka lugta hore ee Champions Leaque-ga wareegiisa afar dhamaadka.Manchester City ayaa ku fikiraysay in ay ka faa iidaysato jamaahiirteeda iyo garoonkeeda waxayna maanka ku haysay culayska ay Santiago Bernabue kaga horeeya ee kulanka lugta labaad. Ugu danbayna waxay labada koxoodba isku mari waayeen barbaro 0-0 ah iyadoon wada sugi doono wareega lugta 2aad ee garoonka Real Madrid ee Santiago Bernabue.

.

Jigjiga( cakaaranews )Arbaco 27ka April 2016, Tababar kusaabsan aalada looyaqaano KEIZAN islamarkaana ah Aalad cusub oo kor loogu qaadayo nidaamka maaraynta qalabyada kala duwan ee dawlada ayaa maanta loo qabtay qaarkamaida shaqaalaha Xafiiska Adeega Shacabka iyo Horumarinta Cududa Shaqaalaha DDSI kaaso ka qabsoomay isla xafiiska.

Tababarkan oo uu soo agaasimay xafiiska tababarada iyo kor uqaadida xirfadaha TVET ayaa waxaa fulinayay macahadka KEIZAN eeJDFI (Ethiopia KEIZAN Institute). Wuxuuna mid lamid ahi tababarkan uu ka socdaa Kuliyada Macalimiinta DDSI.

Hadaba tababarkan ayaa waxaa shabakada cakaaranews uga waramay Gadh/Wadeenka G/S Kobcinta Awooda Fulineed ee Haayadaha Dawliga ah ee Xafiiska Adeega shacabka iyo Horumarinta Cududa Shaqaalaha DDSI mudane Cabdulaahi Muxumed Qaloonbi oo sheegay in tababarkani uu yahay mid muhiim u ah shaqaalaha xafiiska. Maadaama oo uu xafiisku u taaganyahay ka shaqaysiinta iyo hirgalinta barnaamij kasta oo ku aadan dhanka shaqada, shaqaalaha, iyo waliba qalabyada shaqooyinka Lagu fuliyo oo dhan. Wuxuuna intaa kudaray in baranaamijkan KEIZAN uu yahay barnaamij sahlaya dhanka habasami u isticmaalka qalabyada technolojiga, Documentiga archive-yada iyo waliba qalabyada kale ee  iska caadiga ah.

Wuxuuna agaasinku hadal kiisii kusoo gabagabeeyay in marka uu tababarku dhamaado ay guda galayaan sidii ay deegaanka uga hirgalin lahaayeen barnaamijkan cusub ee KEIZAN.

Jigjiga( Cakaaranews ) Khamiis, 28ka April 2016. Madaxwaynaha DDSI mudane Cabdi Maxamuud Cumar oo uu weheliyo madaxwayne kuxigeenka ahna wasiirka xafiiska hawlaha guud iyo horumarinta magaalooyinka dhismaha iyo warshadaha DDSI mudane Cabdixakiin Cigaal Cumar iyo waliba wasiirka ganacsiga iyo gaadiidka DDSI mudane Khadar Cabdi Ismaaciil ayaa gagida diyaaradaha caalamiga ah ee garaad wiil-waal duhurnimadii maanta si heer sare ah ugu soo dhaweeyay wafti uu hogaaminayo madaxwaynaha dawlad goboleedka jubba-land mudane Axmed Maxamed Islaan oo uu kamid yahay wasiirka boostada iyo isgaadhsiinta dawlada soomaaliya mudane Geele Jaamac.

Hadaba Waftigan oo booqasho deegaanka kusoo gaadhay ayaa waxaa socdaalkooda kuwehelinayay mudane Dr. Gurey Fidaariyagoo saaka kasoo kicitimay xarunta dalka ee adhisababa.

Kadibna, waftiga ayaa waxaa si toos ah loogu sii qaaday guryaha martida ee Qaryaan Dhoodaan. Halkaas oo uu kusoo dhaweeyay madaxwayne kuxigeenka ahna madaxa xarunta dhexe ee XDSHSI mudane Cabdicasiis Maxamed Cabdi iyadoo goobtaasna qado sharafeed loogu sii diyaariyay.

Adama(Cakaaranews) Khamiis 28ka April 2016. wadatashi uu soo agaasimay Wasaarada Adeega Shacabka iyo Horumarinta Cududa Shaqaalaha JDFI islamarkaana ujeedadiisu ahayd  sidii looga wada tashan lahaa Mashruuca qiimaynta iyo darajaynta Shaqada Ee Job and Evaluation Grade (JEG) iyo waliba daradar galinta shaqooyinka maamulka suuban oo ay kasoo qaybgaleen masuuliyiinta xafiisyada adeega shacabka iyo waliba agaasimada Geedisocodyada muhiimka ah ee maaraynta cududa shaqaalaha ee Fadaraalka, deegaanada Dalka iyo labada ismaamul magaalo ayaa maanta lagusoo gabagabeeyay Ayu International Hotel ee magaalada Adama ee Deegaanka Oromiya.

HadabaTababarkan oo socon doona mudo 3 cisho ah ayaa waxaa DDSI uga qaybgalay Gadh/Wadeenka G/S Muhiimka ah ee Kobcinta Awooda-fulineed ee Haayadaha Dawliga ah ee Xafiiska Adeega Shacabka iyo Horumarinta Cududa Shaqaalaha DDSI mudane Cabdulaahi Muxumd Qaloonbi iyo Gadh/Wadeenka G/S muhiimka ah ee Maaraynta cududa shaqaalaha ee Xafiiska Adeega Shacabka iyo Horumarinta Cududa Shaqaalaha DDSI mudane Maxamed Cabdikariim  oo sheegay in tababarkani yahay mid wada tashi ah oo ku aadan Mashruuca qiimaynta iyo darajaynta Shaqada Ee Job and Evaluation Grade (JEG)  islamarkaana lagu kala qaadanayo jihooyinkii looga hirgalin lahaa dhamaan haayadaha dawliga ah ee kajira JDFI. Waxayna intaa ku dareen in tababarkan ay kasoo qaybgaleen dhamaan agaasinada dhigooda ah ee xafiisyada dawlad deeganada dalka. Iyagoo  tilmaamay  in doorka kaga aadan ka deegaan ahaan ay soo bandhigeen islamarkaana ay diyaar u yihiin hirgalinta barnaamijkan sanadka soo socoda ee 2009 T.I.

ugudanbayna waxay xuseen in mashruucani uu dalka kasoo socday mudo 4 sono ah islamarkaana larabo in dhamaan dalka laga hirgaliyo. Waxayna carabka ku dhufteen in mashruucani uu leeyahay faa’iidooyin farabadan oo ay ka mid yihiin midaynta dhamaan mushaarka shaqaalaha dawliga ah ee shaqooyinka isku midka ah qabta (equal job equal payments),  iyo waliba in mashruucani uu midaynayo qaabdhismeedka shaqaalaha dalka oo dhan. Wuxuuna suurta galinayaa in darajooyinka iyo shaqooyinka isku midka ahi ay mushaar iskumid ah noqdaan. Iyo waliba in shaqo kasta ay yeelan doonto mushaar u dhigma shaqadaas.

Jigjiga(cakaaranews) khamiis, 28, April, 2016, Madaxwayne ku xigeenka ahna wasiirka waxbarashad  DDSI mudane Mawliid Haayir Xasan  ayaa kulan xafiiskiisa kula yeeshay gudoomiye yeesha Gobolada iyo Degmooyinka ee  gobolada Faafan iyo Siti waxayna kulankaasi ujeedadiisu ahayd sidii loo sii xoojin lahaa fahan buuxana looga siin lahaa maamulada  barnaamijka quutinta gudsiyada  oo ah mid ay dawlada deegaanka gaar ahaan xafiiska waxbarashadu fulinayo.

Waxaana kulankaasi ugu horayntii ka hadlay madaxwayne ku xigeenka DDSI ahna wasiirka waxbarashada DDSI mudane Mawliid Haayir Xasan oo ka warbixiyay ujeedooyinka iyo ahmiyada laga leeyahay barnaamijka quutinta caruurta dugsiyada waxka barata  wuxuuna tilmaamay madaxwayne ku xigeenku in loogu talagalay dugsiyada ku yaala meelaha ay abaaraha cimilada isbadashay keentay saamaysay gaar ahaana gobolka siti iyo faafan si uuna hal arday ah  uga habsaamin isguulka saamaynta abaarta darteed.  Wuxuuna  madaxwayne ku xigeenku maamulada gobolada iyo degmooyinka kula dar dar-daarmay  in ay fahan buuxa ka qaataan barnaamijkan si loogu fuliyo sidii  loogu talagalay.

Jigjiga( Cakaaranews ) Jamce, 29ka April 2016. Madaxwaynaha DDSI mudane Cabdi Maxamuud Cumar oo ay weheliyaan madaxwaynaha jubbaland mudane Axmed Maxamed Islaan iyo waftiguu hogaaminayay ayaa saaka booqasho indha-indhayn iyo khibrad wadaag isugu jirtay kugaadhay biyo-xidheenka qabalaha Waaji ee degmada koonfurta jigjiga ee dhawaantan xadhiga laga jaray oo buux dhaafsamay.

Madaxwayne Cabdi Maxamuud Cumar ayaana sheegay in biyo-xidheenkani kamid yahay 174 biyo-xidheen oo heer deegaan iyo heer degmo laga dhisay sanadkan oo intooda badan biyo galeen isagoo ilaahay uga mahadceliyay hirgalinta qorshaha guud ee xukuumada.

Dhanka kale, madaxwaynaha dawlad goboleedka jubbaland mudane Axmed Maxamed Islaan oo kahadlay qorshahan ayaa aad ugu hambalyeeyay xukuumada DDSI,XDSHSI iyo hogaaminta deegaanka heerarkooda kaladuwan oo ugu horeeyo madaxwayne CMC isagoo xusay in arintan ay kaqaateen khibrad wayn oo aysan horay ugu lahayn dhanka biyo-xidheenada maadaama uu deegaankoodu leeyahay togog iyo wabiyo kudara badda oo ay badduna dhanaan tahay. Wuxuuna intaa kudaray in biyo-xidheeno ay kasamaysan doonaan togoga iyo wabiyada kahor intaysan badda kudarin oo dhanka waraabka beeraha ay uga faaiidaysan doonaan.

Sidoo kale, Waftiga ayaa aad ugu bogay biyaha intaa le’eg ee laqabtay iyo tabta cilmiyaysan ee loo qabtay iyo waliba fikiradii iyo kartidii xalaasha ahayd ee kadanbaysay qorshahan.

Ugudanbayna, waftiga ayaa duhurnimadii soo hadh-galay guryaha martida ee qaryaan dhoodaan iyadoo uu roobab badani kadayaan xarunta deegaanka ee jigjiga iyo nawaaxigeeda.